Волво неодамна ја освои наградата „Зелен камион на годината 2025“ со моделот Volvo FH Aero, токму благодарение на неговиот високо ефикасен мотор и новата аеродинамична кабина Aero. Исто така, ова беше и првиот вистински тест за примена на најновата технологија на Volvo за намалување на отпорот на воздухот.
Стабилизаторите на протокот на воздух во кабината, продолжените дефлектори и модифицираната облога на шасијата се дискретни, но значајни промени што придонесуваат огромно за аеродинамиката. Ова значи дека автономијата, потрошувачката на гориво и емисиите на јаглерод диоксид можат дополнително да се подобрат до 2% во споредба со веќе постигнатите вредности. Во пракса, ова значи дека Volvo FH Aero со нови подобрувања може да постигне до 7% подобра ефикасност на горивото во споредба со претходниот модел Volvo FH.
Новите надградби ќе им бидат достапни на клиентите кои бараат најнови решенија за заштеда на трошоци во транспортниот сектор, а ќе се нудат со различни комбинации на додатоци за кабините Volvo FH, FH Aero и FM*. Предностите на овие подобрувања важат за сите видови погонски системи - електрични, гасни и дизел камиони.
„Целото време поминато во симулации и тестирање во аеродинамичниот тунел се исплатеше, бидејќи со овие нови промени во кабината дополнително ги подобруваме минатогодишните решенија за подобрување на аеродинамиката, што ќе донесе конкретни придобивки за нашите клиенти“, вели Јан Хјелмгрен, директор за управување со производи во Volvo Trucks.
Најзначајниот додаток се стабилизаторите на протокот на воздух во кабината, кои се наоѓаат на горните агли на кабината веднаш до шофершајбната. Користејќи внимателно дизајниран распоред на мали аголни крила, стабилизаторите го насочуваат протокот на воздух околу аглите на кабината.
„Размислувавме надвор од кутијата, користејќи техника што најчесто се користи во авионите, автомобилите од Формула 1 и ветерните турбини. Горните агли на кабината се исклучително критични за аеродинамиката, а со нашиот нов систем на камери наместо ретровизори, успеавме да откриеме нов потенцијал во оваа област - користејќи мали крилца за контрола на протокот на воздух на микро ниво, создавајќи ефект на макро ниво. Овие откритија ќе овозможат и идни аеродинамични иновации“, вели Андерс Тенстам, виш експерт за технологија за аеродинамика во Volvo Trucks.
Иако стабилизаторите на воздухот ја подобруваат аеродинамиката на предниот дел од кабината, тие исто така создаваат подобри услови за две дополнителни надградби: дефлектори на воздух продолжени за 50 mm за да се намали растојанието помеѓу кабината и приколката, како и прилагодена облога на шасијата што овозможува подобро усогласување со задниот браник.
Овие три нови решенија се надополнуваат меѓусебно според принципот 1 + 1 = 3, што значи дека вкупното позитивно влијание е поголемо од збирот на индивидуалните придобивки од секој посебен дел.
Новиот модел Volvo FH Aero е доказ за тоа колку аеродинамиката во модерните кабини на камиони може да придонесе за подобрување на ефикасноста на горивото. Благодарение на продолжувањето на кабината за 24 см и бројните промени за намалување на отпорот на воздухот, Volvo FH Aero носи значителни заштеди на гориво, особено имајќи ја предвид долгата километража при транспорт на долги релации.
* Стабилизаторите на протокот на воздух во кабината се достапни само кај моделите Volvo FH и FH Aero.
LINK до фотографии
