Генерациска средба во фабриката за мотори на Volvo во Шевде

Таа не беше ниту родена кога Volvo FH беше лансиран во 1993 година.
Тој имаше работено на линијата за склопување со години во тој момент.
Запознајте ги Несма и Даниел, сега колеги во фабриката за мотори на Volvo во Шевде каде што се произведува значајниот мотор FH. 

Генерациска средба во фабриката за мотори на Volvo во Шевде

Несма Одисо е родена во 1993 година кога беше лансиран првиот камион FH. Сега работи во фабриката за мотори во Шевде.

Чекорењето по погонот на локацијата за Производство на погонската група во Шевде ви дава чувство речиси како да сте дома. Не во смисла дека луѓето всушност живеат таму, туку пријателската атмосфера и фактот дека изгледа како вработените да се познаваат добро едни со други, ви даваат топол и пријатен почеток на посетата. 

Несма Одисо широко ни се насмевнува додека ја собира и ја врзува својата долга коса. Таа работи тука една година и неколку месеци.

„Многу ми се допаѓа. Мојата смена обично е ноќната смена, а моја задача е да ги склопувам деловите на моторот. На почетокот, бев малку нервозна, но по една година научив многу. Се чувствувам како да се предизвикувам себеси секој ден.“ - вели таа.

Таа живее со нејзиниот сопруг и синот во Шевде, а во Шведска е веќе осум години. Комеморативната 1993 година, кога првиот камион FH се појавил на пазарот, всушност е нејзината година на раѓање, па затоа не се сеќава на првиот камион FH.

„О, не! Бев во стомакот на мајка ми во времето на лансирањето. Дури и не знаев за камионите FH пред да дојдам во Шведска. Знам дека камионот, а и моторот се разбира, беа многу успешни. Убаво е чувството да се склопува нешто што е голем и важен дел од овој камион.“

Генерациска средба во фабриката за мотори на Volvo во Шевде

Даниел Лундгрен беше оператор на склопување во 1993 година.

Меѓутоа, препознатливиот камион и значајниот прв мотор D12 е нешто за што колегата Даниел Лундгрен размислува практично секој ден. Во 1993 година, тој беше оператор на склопување и многу добро се сеќава на првите мотори што ги склопил.

„Се чувствував гордо бидејќи знаев дека некој таму ќе вози камион со „мојот“ мотор.“ - се насмевнува. 

Неговата улога денес е двојна: Менаџер на првата линија за ревизија на производот и тестирање на стандардните работни процедури, каде што моторот се тестира на различни начини, а исто така и возач за контрола на квалитетот, каде што е фокусиран на превенција на квалитетот на производството. Даниел започнал да работи во компанијата кога имал 17 години.

„Кога почнав, сè беше рачно. Сега Несма работи со роботи, а ние ги немавме за склопување порано. Но, чувството меѓу колегите е исто. Исто така, Volvo е компанија во која се напредува и тоа е нешто што навистина го ценам. Всушност, тоа е и советот што би сакал да ѝ го дадам на Несма. Напредувај и образувај се себеси, има многу можности за тоа.“ - вели Даниел.

Nesma кимнува со главата. Нејзината задача делумно се состои во управување со роботите, но и тоа бара многу напор од операторот.

„Во почетокот беше незгодно. Можам само да замислам како било кога сè било рачно.“ - вели таа. 

А што се однесува до советот да ги искористи можностите за развој, таа веќе има планови за иднината.

„Подоцна ќе продолжам да студирам деловна администрација овде во Шевде. Би сакала да останам во Volvo, но по дипломирањето тоа би било во одделот за финансии, наместо овде.“

Се движиме низ погонот, а Даниел и Несма радосно ги поздравуваат луѓето додека поминуваат. Шевде е прилично мал шведски град, а фабриката на Volvo е значајна за неговиот идентитет.

„Луѓето работат тука со генерации. Мојот син, исто така роден 1993 година, сега работи тука.“ - вели Даниел, а Несма се надоврзува:

„Уште еден роден во исто време како и камионот FH. Тоа е одлично.“ 

Факти за Несма Одисо
Возраст: 24 (25 во ноември)
Живее во: Шевде
Семејство: Маж и син
Што работев во Volvo во 1993 година: не бев родена
Мојата работа во Volvo сега: Оператор
Најдобриот дел од работата во фабриката во Шевде: се чувствувам како дома и имам шанса да се развивам
Слободно време: вежбам и поминувам време со моето семејство

 

Факти за Даниел Лундгрен
Возраст:
48
Живее во: Шевде
Семејство: три возрасни деца, внуци и моето куче Сикстен
Што работев во Volvo во 1993 година: работев како оператор и бев дел од изградбата на новиот оддел за линијата за склопување на моторот D12
Мојата работа во Volvo сега: менаџер на првата линија за ревизија на производот и тестирање
на стандардните работни процедури (50 %) и возач за контрола на квалитетот (50 %)
Најдобриот дел од работата во фабриката во Шевде: сите неверојатни луѓе!
Слободно време: работам на мојата куќа, го возам мојот мотоцикл, поминувам време со семејството и со моето куче

 

Факти за фабриката во Шевде 

  • Фабриката во Шевде е дел од Volvo Group Trucks Operations и датира од пред повеќе од сто години. Денес фабриката е производствен погон од светска класа, којшто ја снабдува Volvo Group со дизел-мотори и компоненти. 
  • Број на вработени: околу 3.000. 
  • Вкупната површина на фабриката во Шевде е 265.000 m², којашто е приближно еднаква на 50 фудбалски игралишта.
  • Главните процеси во фабриката во Шевде се лиење, составување и склопување. Фабриката извезува мотори и компоненти за мотори во производните капацитети на Volvo Group на сите континенти во светот.

Related News

Моторот D12 – радикална промена

Кога моторот D12 беше лансиран во 1993 година, тоа навистина беше револуција. Некои велат дека Volvo беше десет години пред времето. Жоран Нихолм, сега пензиониран инженер на Volvo, ни ја раскажува приказната од самиот почеток....

Безбедноста како заштедувач на трошоци

Volvo FH, еден од најбезбедните камиони во светот, е иновативен лидер во безбедносни функции со висок квалитет. Заедно со свесниот начин на размислување за безбедноста на возачот, инвестирањето во безбедносните функции може да придонесе кон заштеда ...